Mignonne, allons voir si la rose

A Cassandre

Mignonne, allons voir si la rose
Qui ce matin avoit desclose
Sa robe de pourpre au Soleil,
A point perdu ceste vesprée
Les plis de sa robe pourprée,
Et son teint au vostre pareil.

Las ! voyez comme en peu d'espace,
Mignonne, elle a dessus la place
Las ! las ses beautez laissé cheoir !
Ô vrayment marastre Nature,
Puis qu'une telle fleur ne dure
Que du matin jusques au soir !

Donc, si vous me croyez, mignonne,
Tandis que vostre âge fleuronne
En sa plus verte nouveauté,
Cueillez, cueillez vostre jeunesse :
Comme à ceste fleur la vieillesse
Fera ternir vostre beauté.

Pierre de RONSARD   (1524-1585)

Sonnet à Marie

  Je vous envoie un bouquet, que ma main
Vient de trier de ces fleurs épanouies,
  Qui ne les eut à ces vêpres cueillies,
  Tombées à terre elles fussent demain.

Cela vous soit un exemple certain,
  Que vos beautés, bien qu'elles soient fleuries,
  En peu de temps, seront toutes flétries,
  Et, comme fleurs, périront tout soudain.

Le temps s'en va, le temps s'en va ma Dame,
  Las ! le temps non, mais nous nous en allons,
  Et tôt serons étendus sous la lame,

Et des amours, desquelles nous parlons
  Quand serons morts, n'en sera plus nouvelle :
  Donc, aimez-moi, cependant qu'êtes belle

RONSARD ETAIT UN VISIONNAIRE - TROP EN AVANCE SUR SON TEMPS!